SI MERDET (Bagian 3)

Oleh Kia Rangkuti

Na landit dalan tu saba tapang
Mamintas bondar tu saba parbalan
Na ancit ma waktu zaman Jopang
Ulit ni ayu baen panutup ni badan

Tano duru madung potpotan
Isuani halak doi sangge-sangge
Dung do zaman madung modern
Pamake ni halak marbage-bage

Targan so sampe tu saba tapang
Ibolus parjolo da saba unte
Ringgas do ia mambantu simatobang
Dung do le ia masuk esempe

Muda ipaias bondar saba unte
Inda da tola na marderet-deret
Dung do si Merdet masuk esempe
Itanda halak maia melalui internet

Saba parbalan na sian dolok
Saba Lambou na sian lombang
Muda ujian nasional dung donok
Ulang be nian sai hamu longang

Mamolus nambur tu Parkutahan
Manyogot ni ari mangguris hapea
Di esema madung bahat parsiajaran
Nabahat gunana di hitaon sasudena

Musim eme musim mardege
Sude do halak marsonang ni roha
Muda lulus ma ia sian esempe
Giot ni rohana baya tu esema

Pakantan dolok pakantan lombang
Mamintas dalan sian Hutanagodang
Muda pamatang baya murmagodang
Nangkan sinaloan doma ambaen podang

Aek Singolot di Purba baru
Aek na macom panumbur saba
Muda dapot baya baju naimbaru
Sonang ni roha da mamakena

Sonang ni roha ni namarsikola
Inda mandemes tu Matematika
Dompak libur sikola anak esema
Manaek aeles ma nian tu Jakarta

Laos mulak mada sian esema
Manguntortor tot idoit daldal
Naribur do baya kota Jakarta
Di trotoar do halak le marjagal

Bahat do halak nian marjagal
Gadisonna muse marasing-asing
Olope bahat di Plaza namarjagal
Inda sadia uida halak Mandailing

Mulak si Merdet tingon Jakarta
Atia si Taing mulak ngon saba
Inda be tarbaen na martata
Dongan “marsilaing” iba tu saba

Olope loja na tingon saba
Inda lupa ia pamangan bodat
Dung do si Merdet masuk esema
Dohot ma ia marsiajar mar”adat”

Na lampas tor lampasan dope gunung
Inda na tarbaen maroban eme sagoni
Harani godangna baya luak Mandailing
Ima ambaen manetek ijur ni Bolanda i

Tano hapea tano ni bargot
Donok muse tanomon eme
Tano sere madung do dapot
Ulang be nian igadis muse

Aha ma baya tabuson di ari poken
Ihan mas baya songon ihan siroken
Sugari bolas baya nian pangidoan
Angkon na sikola songon Sati Nasution

http://www.facebook.com/note.php?note_id=87408559087