“INDA TAROROM”

Oleh: Kia Rangkuti

Zaman sannarion, goarna idokon zaman globalisasi, zaman teknologi inforamsi dot komunikasi, arana ni ima anso idokon duniaon madung dataaaar. Muda ipa sari-sari, ipa ligi-ligi, aha na musim di pangarantoan, pandaraman ni marmocom-mocom jolma, na sian julu dot na sian jae, songoni juo na sian dolok dot na sian lombang; madung nabahatan ma rupana tarboto model-model ni panangko. Di potang niari di akhir Januari 2010 i, bo taringot mada iba di parkancitan ni jolma najolo, ompung-ompung tai, namarjuang mangarekrek anso dapot doma kameredekaan ni bangso Indonesi on; songoni juo mampartahan kamerdekaan i. Bo baen di jasa ni alai ma da anso mardeka ita, tontu dei pantas ita ucapkon tarimo kasi tu alai dot ucapan syukur tu Tuhan Na Maha Kuasoi.

Willem Iskander, ima na udokon di son sebagai “pejuang kemanusiaan”, pejuang di bidang sastra, pejuang pencerahan masyarakat Mandailing, na manulis buku “Si Bulus-Bulus Si Rumbuk-Rumbuk”, sada buku basaon di sikola sampe akhir taon pitupuluan di tano rura Mandailing, tano omas sigumorsing. Syair ni Willem Iskander na jot-jot binege suping niba di waktu menek ima:

Mulak au jolo ale,
anta piga taon nada huboto,
Muda au mulak muse,
ulang be nian sai maoto.
Laos hita marsarak,
marsiapingot do au diho,
Ulang lupa paingot daganak,
manjalai bisuk na peto.

Syair ni Willem Iskander on madung marumur lobi doma tingon saratus taon, madung mangalami beberapa kali cetak ulang di Medan. Pandok ni ompungi Basyril Hamidi Harahap, di buku Si Bulus-Bulus Si Rumbuk-Rumbuk on ma inti sari ni ajaran Willem Iskander. Untuk memahami isina ningia porlu dibaen kajian na lobi dalam arana sakaligus untuk “mandalami” aha do sobobna anso itulis Willem Iskander bait-bait syair i.

Ngada da na tarbaen lanjang-lanjang caritona, arana na urang lanjang dot na urang dalam dope parbinotooan niba taringot tu karya ni Willem Iskander on. Jadi molo sala au manfsirkon na atope mangkaitkon na dot situasi hangoluan ni jolma sannari; mangido moof do da; ngoni aropdo roa anso ipatidaon pamasa di iba dia do utopna, dia do nai dokna. Tai bope songoni udokon, au tarmasukdo sada jolma namarjop no roa mamasa dot marusaho mamahami makna na adong di baliknai tulis ni ompu on.
Kasus Bank Kenturi (maminjam istilah Republik Mimpi) madung rap ita bege caritona sian media massa, baik cetak songoni juo elektronik. Alasan manyalamatkon Bank Kenturi ningna ima manjago anso ulang tarjadi dampak “sistemik”. Inda mangarti iba sanga songon dia naidokon ni alak i "dampak sistemik". Panyalamatan na sampe onom koma pitu trilliun rupiah; padohal data awal na sian BI biayo panyalamatan sakitar onom ratus milyar do. Bo martamba mada sada angko nol nai da. Partambaan ni angko nol on ma na manjdi masalahi di sebagian masyarakat. Aso? Arana diduga adong tindakan na manyalahi ugari, paraturan, tindakan on dianggap “oto’ nai baen ni stekholder i. Molo lolos stekholder na sepadena martanggungjawab di kasus on, bo nangkon nai dokon ni halak ma alai i panangko. Panangko, ima jolma na mambuat dohot sangajo na so bagian nia.

Kasus bobol na rekening melalui ATM, anta na piga Bank di Republik on na da huboto be. Dohot cara na lobi “canggih” ibuat kalai muse ma epeng ni jolma sian Tabungan nai, padahal inda na epeng nia alai i. Madung lobi saratus halak na mangalapor bahaso epeng ni alai madung urak sian rekening/tabungan. Tontu dei on pe tarmasuk do on panangko goarna. Salain dua conto kasus na madung ipajojor nangkin, bahat dope peristiwa na ita masukkon tu parbuatan “manangko”. Ibona boto roa adong sada anakboru, umak-umak di pulo Jawa, ijolung ia mada tar tolu biji coklat di kobun ni jolma na lain; bo nada bedabe; naikurung ni “alai” muse maia. Songoni ma rupa na, na ancit ma da naso adong iba puna. Sampe do inanta on iwawancarai di televisi. Mungkin ambaen gadukna ilala partelevision. Aso Gaduk?

Gaduk mantong, panangko coklat tolu biji dihukum; panangko epeng ni negara on onom trilliun rupiah bolum tontu dei ona hukum. Molo botul inda ona hukuman, inda masuk tu “hotel prodeo”, tontu dei gaduk binege di pinggol ta, songoni juo molo ita pasari-sari dohot ate-ate.

Aha do langa sobob na anso manangko jolma i? Pandok ni si “Budi Anduk” ibagasan bahasa Mandailing ima: “Inda Tarorom”, inda tarantai, inda tartahan nafsui. Jadi sannarion, adong do npanangko sian ginjang adong panangko sian toru; sarupo dei goarna, rap panangko, rap naso pade, rap inda bisuk. Olope alakna madung “marbisuk”, tapi rupa inda bisuk napeto, harani i inda pantas itiru, songoni juo arop ni roa tu stekholder pembangunan di tano rura Mandailing, tano omas sigumorsing. Rap ta ingot ma syair ni diginjang i. @Kia.